Ngjarja e rëndë e ndodhur mbrëmjen e djeshme në Kosovë, ku burri la të vdekur në vend ish-gruan dhe vajzën e tij u diskutua gjatë në media. Siç raportojnë mediat ai kishte shkuar në shtëpinë e ish-gruas dhe pas një konflikti e kishte gjuajtur nënën e 6 fëmijëve dhe 9-vjeçaren me pistoletë.

Sipas ‘Indeksonline’ konflikti mes çiftit kishte nisur që në muajin maj, kur Pjetër Ndrecaj e kishte dhunuar barbarisht Valbonën duke e lënduar në kokë dhe në syrin e majtë. 40-vjeçarja e kishte denoncuar në polici dhe  deri në 11 qershor ai kishte qenë në paraburgim.

Prokuroria ka sqaruar se konflikti mes tyre ka lindur për shkak të një zënke që njëri nga fëmijët e çiftit e kishte me fëmijët e vëllait të Ndrecajt. Siç kishte treguar më parë Valbona, djali i saj kishte gjetur 5 euro në rrugë, ndërsa djali i kunatit kishte pretenduar se ishin të tijat gjë që kishte çuar në një konflikt në mes kunatave. Burri të nesërmen i kishte dhënë djalit të vëllait paratë. 40-vjeçarja ishte ofenduar nga ky veprim dhe ishte zënë me burrin e saj, konflikt ky i cili më pas kishte çuar në sulmin fizik. Në dëshminë e saj Valbona Ndrecaj kishte përmendur se disa herë me radhë ishte rrahur nga burri, ndërsa kishte ankesa se kishte kryer edhe marrëdhënie seksuale pa dëshirën e saj. Një muaj para se të paraburgosej, çifti ishin pajtuar pasi autori kishte premtuar që nuk do përdorte më dhunë.

Ndërkohë për shkak të këtij konflikti marrëdhëniet e tyre s’kanë qenë aspak të mira dhe 40-vjeçari e ka kërcënuar disa herë më parë Valbonën deri sa mbrëmjen e djeshme i shkoi në shtëpi dhe e ekzekutoi atë dhe të bijën.