Breshëri automatiku janë shkrehur në shtëpinë e gazetares së njohur investigative, Klodiana Lala rreth orëve të para të mëngjesit të sotëm, 03:00-04:00. Plumbat kanë prekur muret e shtëpisë, kasën e derës së jashtme dhe kanë thyer xhamat teksa në momentin e ngjarjes brenda ndodheshin familjarët e gazetares, vëllai, babai, si edhe dy vajzat e saj ndërsa vetë Lala ishte aty deri në orët e vona të mbrëmjes.

Në vendngjarje janë gjetur 10 gëzhoja. Sipas "Balkanweb" shtëpia e prindërve është si një shtëpi e dytë për Klodiana Lalan pasi në pjesën më të madhe të ditës, prindërit i mbajnë vajzat e vogla.

Informacioni paraprak i policisë

Më datë 30.08.2018, rreth orëve të mëngjesit, në lagjen “Bruk”, në rrugën “Shkëndija” është qëlluar me armë zjarri në drejtim të pjesës së jashtme të banesës së shtetasit A. L., rreth 64 vjeç.

Nuk ka dëme në njerëz. Po punohet për sqarimin e rrethanave të ngjarjes, identifikimin dhe kapjen e autorit/ve.